दिनकर जी केहे हे

"दिनकर जी केहे हे"
------------------------------------------
डॉ रामाधारी सिंह दिनकर जी केहे हे-
कि 'अजादी के बाद देस म
            नेता के संख्या बाढ़त हे,
जउन ल देखबे तउन ह
               नेता बनना चाहत हे;
नेतागिरी के भूत ह
                मनखे म समावत हे,
शॉर्टकट में सबो मन
                  बड़े बनना चाहत हे,
ये शॉर्टकट के चक्कर ल
                  देस आज ले भोगत हे,
मंगलू,समारू सबो मन
                  नेता बने बर सोचत हे;
देस म सबो मन नेता बनही,
                   तब नांगर  कोन चलाही?
नेता के मोटर-गाड़ी बर
                    सड़क कोन बनाही?
स्कूल म लइका ल
                  कोन मनखे पढ़ाही?
बीमार मनखे काकर कर
                जा के इलाज़ करवाही?
जबान के चलाय ले
               काकरो भला नइ होय,
देस के उन्नति ह
               नेतागिरी म नइ होय,
बिना बीज बोय
                कोन पाथे दाना?
जबान घलो चले नहीं,
                बिना खाय खाना;
देस ल बनाना हे,
                तब शार्टकट गलत हे,
आज हम ला नेता नहीं,
        बने नागरिक के जरुरत हे'।
---------------------------------------------------------
              राम कुमार चन्द्रवंशी
              बेलरगोंदी(छुरिया)
             जिला-राजनांदगाँव
             9179798316
दैनिक दावा RJN में दिनाँक-23/11/17 को प्रकाशित।