दौलत के हे अजब कहानी
"दौलत के हे अजब कहानी"
--------------------------------------------
दौलत के हे अजब कहानी,
करथे जग म मनमानी;
कभू पराया ल एक बनाथे,
कभू खून के रिश्ता ल पानी।
बिन दौलत मिले मान नहीं,
जग म मीठ जबान नहीं;
दौलत बिना ये दुनिया म
कोन राजा अउ रानी?
दौलत के हे अजब कहानी,
करथे जग म मनमानी।
हर मनखे के एक अरमान,
बनना चाहथे सब धनवान;
दौलत खातिर कमाथे मनखे,
जस कोल्हू के बइला घानी;
दौलत के हे अजब कहानी,
करथे जग म मनमानी।
दौलत,कतको नाता जोड़थे,
कतको रिश्ता-नाता ल टोरथे;
भागत हे दौलत के पाछू,
जम्मो मनखे परानी;
दौलत के हे अजब कहानी,
करथे जग म मनमानी।
----------------------------------------------------
राम कुमार चन्द्रवंशी
बेलरगोंदी(छुरिया)
जिला-राजनांदगाँव
9179798316
दिनाँक-8/12/17को दैनिक दावा में प्रकाशित।
Comments
Post a Comment