सावन महीना

"सावन महीना"
-------------------------------------
अँगरी मा जस सोन के मुँदरी,
           अउ मुँदरी मा नगीना,
बड़ मनभावन सदा सुहावन,
              लागय सावन महीना।।

हरियर-हरियर खेत-खार सब,
              हरियर दिखे परिया,
नदिया-नरवा लागय जवान,
           भरे कुँआ अउ तरिया,
गा-गा मेचका ख़ुशी मनावय,
               नाचे उछल पढ़िना;
बड़ मनभावन सदा  सुहावन,
             लागय सावन महीना।।

चले काँवरिया करत जयकारा,
                 गुँजय कोना-कोना,
कभू हर-हर महादेव ले,
                कभू बम-बम भोला;
लागे अइसन भीड़ मन्दिर मा,
                  जइसे बजार मीना,
बड़ मनभावन,सदा सुहावन,
               लागय सावन महीना।।

आथे खुसियाली धरके सावन,
           जाथे खुसियाली छोड़ के,
मया-पिरीत के राखी मा,
            भाई-बहिनी ला जोड़ के,
लागे अधूरा,बारों महीना,
                      सावन के बिना;
बड़ मनभावन सदा सुहावन,
               लागय सावन महीना।।

               राम कुमार चन्द्रवंशी
               बेलरगोंदी (छुरिया)
               जिला-राजनांदगाँव
               9179798316