बधाई अजादी के
Subject: बधाई अजादी के (घनाक्षरी)
"बधाई अजादी के"
--------------------------------
उठो नर-नारी सब,करव तियारी अब,
आगे संगी दिन हर,देखव बहार के।
जम्मो झन सियान ला,लइका नौजवान ला,
बधाई हे गाड़ा-गाड़ा,अजादी तिहार के।।
साफ गली खोर राखो,आओ सब झूमो नाचो,
देखे खड़े टक बाँध,मनखे संसार के।
सबो वीर जवान ला, कमइया किसान ला,
बधाई हे गाड़ा-गाड़ा,अजादी तिहार के।।
तिरंगा के मान राखो,हिरदे सम्मान राखो,
चिनहा ये पुरखा के,रकत के धार के।
सबो गाँव के वासी ला,शहर के निवासी ला,
बधाई हे गाड़ा-गाड़ा,अजादी तिहार के।।
छोड़ो संगी जात-पात,रहो मिल साथ-साथ,
मान लेवो संगी मन,कहेना 'कुमार' के।
बात मोर झन टारो,हिरदय ले स्वीकारो,
बधाई हे गाड़ा-गाड़ा,अजादी तिहार के।।
राम कुमार चन्द्रवंशी
बेलरगोंदी (छुरिया)
जिला-राजनांदगाँव
9179798316
Comments
Post a Comment