सुनो सरकार सुनो
सुनो सरकार सुनो
--------------------------
सुनो सरकार सुनो,हमरो गोहार सुनो,
करव अब अरजी,हमरो स्वीकार जी।
जोहत हन बाट ला,भेजो अब विकास ला,
करव अब हमरो गाँव के उद्धार जी।।
गली अँधियार हावे,सड़क बेहाल हावे,
गाँव ला अस्पताल के हावे इंतजार जी।
खोर मा न नाली हावे,बड़ बदहाली हावे,
करव अब हमरो गाँव के उद्धार जी।।
भवन बिना स्कूल हे,जइसे बिना बाप के,
खुले होंगे बारा साल,हावे बेआधार जी।
आके देखव गाँव मा,राखो अपन पाँव ला,
करव अब हमरो गाँव के उद्धार जी।।
रोवत सड़क हावे,बिना मुरूम गिट्टी के,
कहत कहानी हवे खुद बार-बार जी।
विनती ला स्वीकार के, सड़क ला सिंगार के,
करव अब हमरो गाँव के उद्धार जी।।
राम कुमार चन्द्रवंशी
बेलरगोंदी (छुरिया)
जिला-राजनांदगाँव
9179798316
Comments
Post a Comment