गउ के करबो सेवा

(छप्पय )
गउ के करबो सेवा
--------------------------------------------
करबो चलो उपाय,गाय के करबो सेवा।
पुन के आवय काम,सदा जी पाबो मेवा।।
देथे गोरस गाय,दही अउ माखन पाथन।
बनथे बछवा बैल,खेत मा फसल उगाथन।।
गउ के गोबर पाय जब,माटी सदा सधाय जी।
लीपे अँगना द्वार ले,कीड़ा मन दुरिहाय जी।।
गावय सदा पुरान,गाय के जुग-जुग महिमा।
हावय नित सुनसान,गाय बिन जगत सही मा।।
धरती के साक्षात,गाय हर देवी आवय।
माने जेहर बात,उही मन माखन खावय।।
गउ के सेवा जे करे,कटे सदा ही पाप हर।
सेवक गउ के धन्य हे,पुरखा अउ माँ-बाप हर।।

                राम कुमार चन्द्रवंशी
                बेलरगोंदी
                जिला-राजनांदगाँव
                 9179798316