काम करव जाँच के

गीतिका
          "काम करव जाँच के"
      ---------------------------------
राख के बिंसवास अन्तस,बाट जिनगी के चलौ।
दूसरा के अन्न-धन ला देख के जी ना जलौ।
काम उल्टा कर जगत मा,हाथ पाछू झन मलौ।
नित पसीना गार के जग मा सदा फूलो फलौ।।

छल-कपट नइ काम आवय,बात ला जी मानलौ।
जी जगत के एक हावे,जान लव पहिचानलौ।
बढ़ जगत मा न कुछु हे, मान अउ सम्मान ले।
झन भुलावव बात ला जी, मान बढ़थे दान ले।।

छोड़ गुस्सा दुश्मनी ला,मीठ बोलव बानगी।
नित करव छोटे ल माया,अउ बड़े ला पैलगी।
बात ला सबके सुनव जी,संग देवव साँच के।
काम जिनगी मा करव जी,नित बरोबर जाँच के।।

           राम कुमार चन्द्रवंशी
           बेलरगोंदी (छुरिया)
           जिला-राजनांदगाँव
           9179798316
प्रकाशित दैनिक दावा RJN 05/02/2019