बात बोलो जाँच के

Subject: सीता (वर्णिक)(प्रकाशित दावा)

            सीता छन्द (
    प्रत्येक पंक्ति 15 वर्ण)
(र त म य र) 212 221 222 122 212
          बात बोलो जाँच के
   ----------------------------------
जिन्दगी के बाट रेंगो,द्वेष ईर्ष्या छोड़ के।
लोग ले राखो सदा जी,प्रेम नाता जोड़ के।
प्रेम देथे मान संगी,मान ले हे सान जी।
नाम जिंदा राखथे,छोड़ो कभू ना दान जी।।

छाँव आथे घाम जाथे,जिन्दगी मा मानलौ।
ठानथे जे ओकरे जी,जीत होथे जानलौ।
लाख आवै कष्ट हा,त्यागो कभू ना नीत ला।
सान से गावौ सदा ही,प्रेम के जी गीत ला।।

टूट जाही कोन बेरा,डोर हा जी साँस के।
बाँट लेही तोर रिश्ते,माल ला जी हाँस के।
झूठ के रद्दा तियागो,बाट रेंगो साँच के।
धर्म ला छोड़ो कभू ना,बात बोलो जाँच के।।

            राम कुमार चन्द्रवंशी
            बेलरगोंदी (छुरिया)
            जिला-राजनांदगाँव
            9179798316
प्रकाशित दैनिक दावा RJN 27/4/2019